“老友,你今日FB咗未啊?”“Soz,冇啊,咩事呢?”“我哋成日用嗰啲IN话已经‘升呢’,编入咗英国权威字典。”“OMG!唔系咁正哇,我举晒手脚‘十卜’啊。”

　　以上呢啲网络常用嘅叹息声、简写词、创新语,即系俗称嘅“潮语”,已经成为新一代语言,反映时代潮流新趋势。好似FB(face　book)、Soz(sorry)、OMG(Oh　My　God)等潮语唔系个个都明,唔上网唔够潮嘅人甚至觉得系外星语,污染语言纯洁。不过有报道就话英国权威字典已经接受咗潮语,编收咗唔少呢类语言,潮语正式登入主流英语嘅殿堂。

　　除咗头先讲嗰啲,重有咩潮语咁巴闭啊?例如社交网站常用字hmm(一种抒发感受嘅声音,不知应该讲咩,唔想讲出谂法,或者唔在乎人哋讲咩)；staycation(stay逗留+vacation度假,指放大假唔外出度假)；noob(newbie缩写,代表一种游戏或活动嘅新手)；mankini(男坚尼,Deep　V形男士泳裤,V尖端遮掩重要部位,露出屁股)……

　　见到咁多英文嘅潮语,点可以唔为大家恶补下粤语嘅潮语啊。以为识O嘴(惊讶无言以对)、烂gag(好差嘅笑话)、十卜(support支持)、山寨(由小型规模工厂仿制嘅劣质物品)就唔会畀人梅窝(由“正生书院”衍生出来嘅词语,指歧视),可能冇咁简单喔。起码都重要知道咩叫“打边炉”(烟民围住垃圾桶食烟)、“孔雀开屏”(男性向女性大骚魅力)、“low　B”(低能)。男仔记得唔好做毒男(沉迷于不健康活动嘅男性),或者好似龙友(女艺人或僆模出席活动常见嘅拍摄人像发烧友)识多啲知识。女仔就最好唔好有公主病(极度自我膨胀,病态嘅恃宠生骄),讲嘢咪有语癌(表达能力有问题,比语病更严重),成日挂住同啲friend丧拼(shopping读成中文,疯狂购物嘅意思),大家好容易揽炒(揽住一齐死,累斗累)口架。