央视网|中国网络电视台|网站地图 |
客服设为首页 |
嗰日,隔离屋嘅小弟弟阿福唔小心跌咗跤,个额头肿咗个红色嘅大包。阿福嫲嬷摸住佢个头,心里边好肉痛,不过嘴就话,“唔紧要,起咗个楼,迟啲就好返啦。”
响广州人嘅嘴里边,每个细路哥其实都系开发商,佢地嘅成长过程中,会起楼无数。所谓起楼,就系好似阿福咁,跌跤或者碰撞,头上突起一个包,好似地下起咗栋大厦咁。唔单只有屋住,而且仲相当于长高咗,细路听到咁讲,原来痛嘅,都变成唔痛啦。
我一直觉得,起楼呢个词,反映咗我哋南方人嘅幽默风趣。细路仔跌跌碰碰,又痛又喊,但系大人一句玩笑,就将呢种紧张嘅气氛化解于无形之中。
起楼呢个词,亦显示咗我哋祖辈嘅育儿理念:一方面,细路需要粗生粗养,跌个跤系家常便饭,用起楼来做个心理安慰就搞掂,冇乜值得大惊小怪。记得我细个阵时,大人有句俗话,叫“一跌一大,唔跌会生癞”,就系大人用来安慰跌跤嘅细路仔嘅话。虽然好粗俗,但今时今日想起,又真系蕴含咗深刻嘅人生哲理:细路嘅成长,就好似生活,唔可能一帆风顺。挫折,系成长嘅必经之路。
反观如今,好多父母就冇以前咁超脱,个靓仔俾蚊子叮咗下,都紧张到不得了。养育细路,从旧阵时嘅放养,变成咗今日嘅圈养,跌过跤,就冇起楼咁好玩啦。可能系因为当今楼价贵咗,楼,唔系随便可以起咯。